Өнөктөш уюмдардын жолугушуусу болуп өттү
2025-жылдын 26-сентябрында Кыргыз Республикасынын Улуттук банкында Кыргызстанда «Дүйнөлүк каражат топтоо күнү-2025» кеңири масштабдуу маалымат-билим берүү иш-чарасын өткөрүү боюнча өнөктөш уюмдардын жолугушуусу болуп өттү.
Бул масштабдуу иш-чаранын миссиясы – коомчулуктун көңүлүн финансылык сабаттуулукту жогорулатуу маселесинин маанилүүлүгүнө буруу, каражат топтоону өнүктүрүү, ошондой эле финансылык сабаттуулук негиздери, финансылык коопсуздук, акчаны тескөө көндүмдөрү жана алгылыктуу финансылык чечимдерди кабыл алуу жөнүндө маалымат берүү.
Бүткүл дүйнөлүк каражат топтоо күнүнүн алкагында ар кандай иш-чараларды өткөрүү пландаштырылууда: финансылык жарманке, ачык сабактар, лекциялар, интерактивдүү оюндар, финансылык мекемелерге экскурсиялар жана ачык эшик күндөрү, сынактар жана викториналар. Иш-чаралардын толук тизмеси Улуттук банктын расмий интернет-сайтында жана финансылык сабаттуулук боюнча www.finsabat.kg сайтында жайгаштырылат.
Маалымат үчүн: Дүйнөлүк каражат топтоо күнү-2025 Кыргызстанда Кыргыз Республикасынын Агартуу министрлиги, Кыргыз Республикасынын Илим, жогорку билим берүү жана инновациялар министрлиги, ошондой эле эл аралык уюмдар жана өлкөнүн финансы-кредит уюмдары менен биргеликте өткөрүлөт.
Басып чыгарууга 
